КЈП-НИСКОГРАДБА

Врз основа на член 36 став 1 точка 15 од Законот за локалната самоуправа („Службен весник на Република Македонија“ бр.5/02 и „Службен весник на РСМ“ бр.202/24), член 17-а став 2, член 26 и член 26-а од Законот за јавните претпријатија („Службен весник на Република Македонија“ бр.38/96, 9/97, 6/02, 40/03, 49/06, 22/07, 83/09, 97/10, 61/12, 119/13, 41/14, 138/14, 25/15, 61/15, 39/16, 64/18 и 35/19 и „Службен весник на Република Северна Македонија“ бр.275/19, 89/22, 274/22 и 208/24), член 2 од Правилникот за формата и содржината на јавниот повик за пројавување на интерес за пријавување на кандидати за избор на член на управен и надзорен одбор на јавно претпријатие, начинот на поднесување на пријавата, образците за пријавување и начинот на бодување и селекција на кандидатите („Службен весник на Република Северна Македонија“ бр.213/2024) и член 70 од Статутот на Општина Битола („Службен гласник на Општина Битола“ бр.10/05, 17/08, 8/19, 14/20, 19/20 и 5/21), а по предлог на Градоначалникот, Советот на Општина Битола објавува:

ЈАВЕН ПОВИК
ЗА ПРОЈАВУВАЊЕ НА ИНТЕРЕС ЗА ПРИЈАВУВАЊЕ НА КАНДИДАТИ ЗА
ИЗБОР НА ЧЛЕНОВИ ВО УПРАВЕН ОДБОР И НАДЗОРЕН ОДБОР ЗА
МАТЕРИЈАЛНО-ФИНАНСИСКОТО РАБОТЕЊЕ НА КЈП „НИСКОГРАДБА“
БИТОЛА

ПРЕДМЕТ НА ЈАВНИОТ ПОВИК

Предмет на Јавниот повик е спроведување на постапка за избор на седум члена во управен и три члена во надзорен одбор за контрола на материјално-финансиското работење на КЈП „Нискоградба“ Битола со седиште на ул. „Булевар 1-ви Мај“ бр.66, Битола.

Постапката ќе се спроведе согласно Правилникот за формата и содржината на јавниот повик за пројавување на интерес за пријавување на кандидати за избор на член на управен и надзорен одбор на јавно претпријатие, начинот на поднесување на пријавата, образците за пријавување и начинот на бодување и селекција на кандидатите („Службен весник на Република Северна Македонија“ бр.213/2024).

ПРАВО НА УЧЕСТВО

Право на учество имаат сите лица кои ќе изразат интерес за пријавување и кои ги исполнуваат условите предвидени во Јавниот повик.

Јавниот повик со сите услови се објавува на веб страната на Општина Битола
https://www.bitola.gov.mk/
и на страната на КЈП „Нискоградба“ Битола
https://niskogradba.pelagonet.mk/

УСЛОВИ КОИ ТРЕБА ДА СЕ ИСПОЛНАТ СОГЛАСНО ЗАКОНОТ ЗА ЈАВНИ ПРЕТПРИЈАТИЈА

За член на управен одбор и надзорен одбор за контрола на материјално-финансиското работење на КЈП „Нискоградба“ Битола може да биде лице кое ги исполнува следните услови:

– е државјанин на Република Северна Македонија;

– има стекнати најмалку 240 кредити според ЕКТС или завршен VII степен образование од областа на правните науки, економските науки или од областа на дејноста на јавното претпријатие и
– во моментот на именувањето со правосилна судска пресуда не му е изречена казна или прекршочна санкција забрана за вршење на професија, дејност или должност.

Членовите на управниот одбор на КЈП „Нискоградба“ Битола, треба да имаат најмалку пет години работно искуство од кои:
– најмалку еден член на управниот одбор со работно искуство од областа на финансиското работење и
– најмалку еден член на управниот одбор со работно искуство од областа на правните работи.

Членовите на надзорниот одбор на КЈП „Нискоградба“ Битола а треба да имаат и соодветно работно искуство, и тоа:
– еден член на надзорниот одбор, треба да има најмалку пет години работно искуство,
– еден член на надзорниот одбор треба да има најмалку пет години работно искуство од областа на финансиското работење и
– еден член на надзорниот одбор треба да има најмалку пет години работно искуство од областа на правните работи.

Времетраењето на мандатот на членовите на управниот одбор и на надзорниот одбор за контрола на материјално-финансиското работење на КЈП „Нискоградба“ Битола изнесува четири години, со право на уште еден последователен мандат.

РАБОТНИ ЗАДАЧИ, ОДГОВОРНОСТИ, ПРАВА И ОБВРСКИ НА ЧЛЕНОВИТЕ ВО УПРАВЕН ОДБОР И НАДЗОРЕН ОДБОР ЗА КОНТРОЛА НА МАТЕРИЈАЛНО-ФИНАНСИСКОТО РАБОТЕЊЕ

Согласно член 19 од Законот за јавните претпријатија, Управниот одбор ги извршува следните работни задачи, одговорности, права и обврски и тоа:

Управниот одбор на јавното претпријатие го донесува статутот на јавното претпријатие, ја усвојува програмата за работа и развој на јавното претпријатие, ја утврдува деловната политика, ги усвојува тримесечниот извештај кој содржи показатели за финансиското работење, годишната сметка и извештајот за работењето на јавното претпријатие, одлучува за употребата на средствата остварени со работењето на јавното претпријатие и покривањето на загубите, ги донесува одлуките за инвестиции, ги утврдува цените на производите и услугите, одлучува за внатрешната организација на јавното претпријатие, го донесува актот за утврдување на висината на вредноста на бодот за пресметување на платите на вработените во јавното претпријатие и друго.

Согласно член 27 од Законот за јавните претпријатија, Надзорниот одбор ги извршува следните работни задачи, одговорности, права и обврски и тоа:

Заради вршење на работите на контрола, надзорниот одбор за контрола може да врши испитување на лице место на сите документи и списци на јавното претпријатие.

Надзорниот одбор за контрола може заради испитување на документите и списите на јавното претпријатие да повика стручни лица кои ќе му помагаат во решавањето на надзорот.

Членовите на надзорниот одбор за контрола можат да присуствуваат на седницата на управниот одбор и им се доставува покана со сите материјали што им се доставуваат на членовите на управниот одбор.

Надзорниот одбор за контрола задолжително ги прегледува тримесечните извештаи кои содржат показатели за финансиското работење, годишните сметки и извештајот за работа на јавното претпријатие и по прегледувањето му дава мислење на управниот одбор. Управниот одбор не може да ги усвои тримесечните извештаи кои содржат показатели за финансиското работење, годишните сметки и извештајот за работењето на јавното претпријатие, ако претходно не добие позитивно мислење од надзорниот одбор за контрола.

Надзорниот одбор за контрола може да дава одобрување на актите донесени од управниот одбор, доколку тоа е утврдено со статутот на јавното претпријатие.

Извештајот за преглед на годишните сметки и извештајот за работењето на јавното претпријатие со свое мислење, надзорниот одбор за контрола му го доставува на министерот за финансии. Во извештајот до министерот за финансии, надзорниот одбор за контрола го известува за состојбата на јавното претпријатие врз чие работење врши контрола. Надзорниот одбор за контрола копие од извештајот му доставува и на министерот надлежен за работите на соодветната дејност.

Претседателот на надзорниот одбор на јавното претпријатие или доколку претседателот од оправдани причини не е во можност да присуствува членот на надзорниот одбор овластен од претседателот, е должен да присуствува на седницата на Советот на општината, кога се дискутира и се одлучува за работи и документи од надлежност на надзорниот одбор на јавното претпријатие.

Надзорниот одбор задолжително се состанува најмалку четири пати годишно.

НАЧИН НА ПРИЈАВУВАЊЕ НА ЈАВНИОТ ПОВИК

Задолжителни документи кои треба да бидат доставени како доказ за исполнување на условите за член на управниот одбор и надзорниот одбор на КЈП „Нискоградба“ Битола се:

– Уверение за државјанство на Република Северна Македонија;
– Уверение или диплома за завршено високо образование и стекнати 240 ЕКТС или завршен VII/1 степен образование;
– Потврда дека со правосилна судска пресуда не му е изречена казна или прекршочна санкција забрана за вршење на професија, дејност или должност;
– Потврда за евидентиран стаж од Фондот на пензиско и инвалидско осигурување на Република Северна Македонија;
– Историјат на работните односи од Агенцијата за вработување на РСМ;
– Кратка биографија;

– Сертификати, лиценци, уверенија, дипломи од областа за која треба да бидат членовите на управниот, односно надзорниот одбор издадени од овластени односно акредитирани институции за нивно издавање согласно закон.

ПОСТАПКА ЗА СЕЛЕКЦИЈА НА ЧЛЕНОВИТЕ

Постапката за селекција на кандидатите за членови во Управен одбор и Надзорен одбор за контрола на материјално-финансиското работење на КЈП „Нискоградба“ Битола се состои од две фази и тоа:

– Фаза 1 – административна селекција (фаза во која се врши проверка на внесените податоци во пријавата со условите од јавниот повик кои треба да се идентични со условите утврдени во Законот за јавните претпријатија, како и на доставените докази и се врши нивно бодирање) и
– Фаза 2 – интервју (фаза во која преку ситуациони и стручни прашања и практични задачи се проверува дали општите и посебните работни компетенции на кандидатот и се врши нивно бодирање, а се поставуваат општи прашања со кои се проверува интересот и мотивацијата на кандидатот за работата, прашања за неговото претходно работно искуство, очекувањата на кандидатот и сл.).

Точниот датум, време и место на одржување на интервјуто ќе бидат објавени на веб страницата на Општина Битола.

РОК И НАЧИН НА ДОСТАВУВАЊЕ НА ПРИЈАВИТЕ

Јавниот повик се објавува на ден 26.01.2026 година и трае 5 (пет) дена, односно најдоцна до 30.01.2026 година.

Пријавените кандидати, соодветната документација во хартиена форма во оригинал или копија заверена на нотар заедно со пополнета Пријава на образец за пријавување (Прилог бр.1) да ја достават до:

Архивата на Општина Битола, Бул. „1 Мај“ бр.61, Битола (со назнака: За Јавен повик за пројавување на интерес за пријавување на кандидат за избор на член во Управен одбор/Надзорен одбор за контрола на материјално-финансиското работење на КЈП „Нискоградба“ Битола)

Незадоволните кандидати од изборот за членови во управен одбор и надзорен одбор за контрола на материјално-финансиското работење на јавното претпријатие имаат право да поведат управен спор до надлежен суд согласно со Законот за управни спорови.

Напомена: Пријавите без комплетно приложена документација или кои се доставени по истекот на предвидениот рок нема да се разгледуваат.

Бр.09-6/1
23.01.2026 год.
Б и т о л а